Қазақстан Республикасы күніне арналған салтанатты шара өтті

24 қазанда Республика күніне арналған салтанатты жиын өтті. «Мемсараптама» РМК бас директоры Қажкенов Қуандық ұжымды мерекелерімен құттықтап, Қазақстанның құрылыс саласының дамуына үлес қосқан қызметкерлерге Министрліктің және Құрылыс және тұрғын үй-коммуналдық шаруашылық істері комитетінің төсбелгілері мен алғыс хаттарын табыс етті. «Өткен жылы Мемлекет басшысы Қасым-Жомарт Тоқаевтың ұсынысымен Республика күні ұлттық мереке мәртебесіне ие болған еді. Енді бұл күн – мемлекет құру жолындағы тарихи қадамның айқын символы ретінде кең көлемде аталып өтетін болады. Осылайша Республика күнінің қайта бекітілуі маңызды тарихи шешімдердің біріне айналды. Өйткені қайта жаңғырған ұлттық мереке халқымызды одан әрі еркіндікке жетелеп, сан жылдар бойы армандаған егемендік бүгінде ғасырлар тарихынан сыр шертері анық», – деді Кажкенов К. Сонау 1990 жылғы 25 қазанда Қазақстан өз егемендігі туралы декларация қабылдаған болатын. Бұл – тұғыры биік төл мемлекеттілігімізді қалыптастыру жолындағы алғашқы қадам еді. Маңызды құжатта елдің саяси-құқықтық дербестігінің тұңғыш бағдарламасы баяндалды. Сонымен бірге мемлекет аумағының тұтастығы мен ұлттық қадір-қасиетті нығайту жолындағы маңызды міндеттер айтылды. «Рухы асқақ, намысы өр бабаларымыздың сан ғасырлар бойғы мақсаты – азаттықты аялау болса, біздің асыл мұратымыз – егемендіктің тұғырын баянды етіп сақтау», – деді Бас директор.